Иялан вуйым ида пу

Молан айдеме южгунам шкаланже вуй огыл? Молан тудо шоныдымо пашам ыштылеш? Мо тудым алгаштара? Ала вара «Ик языкыш пурет гын, кумшыжымат ыштет?» манмым чынлан шотлыман. Ойлат вет: «Умшам ырыкташ ик чаркым подыльым, варажым омат шинче, кузе руштын шуҥгалтынам», «Ик тылзе тамакым шымак шупш, иктым пӱтыральым гын, уэш шупшде омат чыте».

Кушто тыгай койышын амалже? Чонемым тургыжландарыше ты йодыш-влаклан вашмутым кужаш кычальым, тӱрлын шонкалышым, вискалышым. Ракмат Юмылан, Библий книгаште ӱшандарыше вашмутым верештым. Тушто тыгай мут-влакым кычал муым: «Кунам осал шӱлыш айдемын кӧргӧ гыч лектеш, тудо вӱддымӧ ир мландыште ласкалык верым кычал коштеш, но огеш му да шкаланже ойла: «Мый коден кайыме ончычсо пӧртышкем пӧртылам». Пӧртылмекыже, тудым арун ӱштын да поген шындымым ужеш. Тунам кая да пеленже шкеж деч осалрак шым  шӱлышым конда. Нуно ынде ты айдеме кӧргыштӧ чылан пырля илаш тӱҥалыт. А айдеме ончычсыж дечат ударакыш савырна» (Лк. 11:24-26).

Теве кушто вашмут. Ынде умылаш лиеш, молан еҥ-влак тыге толашат. Садлан, аракам йӱмӧ, тамакам шупшмо але иктаж вес осал койыш деч утлаш шонеда гын, нигунамат еҥ-влаклан мутым ида пу. айдеме шке вуй ушыж дене тидым сеҥен огеш керт. Молан манаш гын, илышыште тӱрлӧ пагытат лиеш, варажым эше шке мутет дене тӧрлалт кертат. Изиш иям кӧргышкет пуртышыч гын, варажым тӱсенат от керт. Садлан мут пуыде шолаш тыршыза. А мый шкеже полышым кӱшыч йодын кумалам:

«Кугу Юмо, пыл помышсо Ача. Шке ӱнарем дене тиде койышым сеҥен ом керт, садлан мыланем тиде эҥгек деч утлаш вийым, куатым пу. Кугу Оза, тыланет гына ӱшанем, полшо мылам. Порылыкет ӱмырешлан лийже. Тыйын лӱмешет, Кугу Оза, аминь».

Кӧ шке вийжылан ӱшана гын, тек кучедалеш. Только мыняр пагытлан тиде сеҥымагш? Кӧн ӱнарже, вий-куатше сита, возен колтыза.

Опубликовано в газете «Чолман», №42, 1997,

г. Нефтекамск  

Порекомендуйте произведение вашим друзьям

0
Вы можете оставить комментарий, или ссылку на Ваш сайт.

Оставить комментарий