Арака

Омар Хайям дене дуэль

Уке, ок кӱл ынде мылам

«Шайтанын вӱдшӧ» курымеш,

Кеч аракам Омар Хайям

Мастарын моктыш шер теммеш!

 

Уке, ок кӱл ынде мылам

Тӱняште ушдымо йӱмаш,

Кеч арака лийын мылам

Шукерте огыл «чон» йолташ!

 

Коленыт шуко шочшо-влак,

Черет ыле тугак мылам,

Но ынде, каласем, чынак

Эҥгек деч йӧршын утленам!

 

«Йӱде илаш ок лий,– ойлат,–

Вет арака пашам ышта:

Вӱтам, сурт-печым ачала

Да шке йӱмашым вуйлата».

 

Шоям ит куктыл, чынденак

Тый Юмо отыл, кеч кертат,

От кӱл тый, патыр вуйволак,

Кеч тыйым шукын пагалат.

 

Мокмырым йӧсын шӧрымаш,

Сӧсна гай мландым куралмаш –

Чыла тидым лиеш ужаш,

Садлан тыйым ок лий мокташ.

 

Шинчам лумаш да ондалаш,

Йолташым мыскылаш, агаш,

Айдемым аҥырташ, малташ,

Йоргаланен чара кошташ,

 

Сигар тамакым тӱтыраш,

Арвер-ӱзгарым шолышташ,

Сыраш да ӱчашаш, сӧйгаш,

Вес еҥым вӱр марте кыраш –

Чыла тидым лиеш ужаш,

Лач тиде пашатше улмаш!

 

«Сита, сита, –  тый каласет,–

Молан тынаре чот орлет?

Вет уло поро пашамат,

Айдемылан кӱлеш куат!

Айдемым ойго темымек,

Кузе тудым пасылтараш?

Куатле вӱд – тудлан пӧлек,

Ласкалык йӱыш, эм памаш».

 

Мыняре шуко еҥ пужлен

Тыглай проста ден ушанжат,

Шиша пундашышке пурен,

Вет нуно кул семын илат.

Эрдене мокмыр, шӱм коршта,

Кастене угыч гӱжлымаш,

Тыге нунын ийгот эрта,

Тораште огыл колымаш.

 

Уке, ок кӱл ынде мылам

Тӱняште ушдымо йӱмаш,

Кеч арака лийын мылам

Шӱм-чон пусталык деч шылмаш!

 

Айдеме тукым, колышт-ян,

Кугезе ты чоя иям

Тийыш чынлен кудалтыман,

Уке гын, сорлыкла мемнам.

Порекомендуйте произведение вашим друзьям

0
Вы можете оставить комментарий, или ссылку на Ваш сайт.

Оставить комментарий